Jelena Simić: Najljepše je igrati za djecu

 „Večeras je cijela predstava bila interatkivna jer su djeca bila na sceni. Meni je najljepše igrati za djecu“ – kazala je za naš radio Jelena Simić koja je glumila u dječijoj predstavi „Snežana i sedam patuljaka“ Gradskog pozorišta iz Podgorice.

Predstava je odigrana na Ljetnjoj pozornici, a kako je palo i malo kiše, djeca su se skupila na sceni, zajedno sa glumcima, što je dalo dodatnu draž predstavi.

„Drago mi je da smo odigrali predstavu jer se djeca raduju pozorištu. Milo mi je da su ljudi ostali da gledaju. Od djece dobijamo energiju koja nam treba. Oni nisu suzdržani. Kad im se nešto dopada dopada im se do kraja. Kad im se ne dopada, isto tako daju do znanja. Najpoštenija i najiskrenija publika. Odrasli vode računa da budu pristojni. I ostaje da se priča nakon predstave. A sa djecom nije tako. Vidjeli ste i večeras.

Gradsko pozorište je primarno dječije pozorište. Većinu pažnje poklanjamo repertoaru za djecu. A uvijek nam je lijepo da igramo u Tivtu“ – kaže Jelena Simić.