NBA: FENOMENALNI “DURANTULA”

 

 

Kevin Durant je sam pobjedio Minesotu. Ne pretjerujemo, ubacio je 32 poena, imao 10 skokova, 12 asistencija, po 4 blokade i  ukradene lopte. “Durantula” je jednostavno bio savršen u utakmici u kojoj je Tander ponovo dopustio rivalima da naprave prednost, ali i na vrijeme se pribrao i dobio meč. Na drugoj strani odličan Peković sa 22 poena i 10 skokova,  Lov je ubacio 16, uz loš procenat šuta. Timbervulvsi su imali procenat oko 40% što i ne izgleda loše, ali osim Pekovića starteri su podbacili.

Njujork je izgubio deveti meč u nizu, sedmi kod kuće, Pelikansi su se gostili u MSG, ali su skupo platili pobjedu, Entoni Dejvis je polomio ruku. Nikse je uništio Rajan Anderson koji je sasuo sedam trojki, ubacio ukupno 31 poen, a domaćina je dotukao Tajrek Evans u posljednjoj četvrtini.

Stiven Kari je sa 36 poena i 10 asistencija bio ključ pobjede Voriorsa u Sakramentu. Mali derbi Kalifornije je donio uzbudljiv meč, Golden Stejt je pao u formi poslije sjajnog starta, ali su nekako isčupali pobjedu, dva bacanja Karija osam sekundi prije kraja su presudila Kingsima.

Rezultati:

Lejkersi – Portland 108:114
Njujork – Nju Orleans 99:103
Oklahoma – Minesota 113:103
Sakramento – Golden Stejt 113:115
Majami – Šarlot 99:98
Klipersi – Indijana 100:105
Detroit – Filadelfija 115:100
Toronto – Denver 98:112