marmelada

Sve od šipka

SVE OD ŠIPKA

BALZAMIKO OD ŠIPKA

Koliko svježeg soka od šipka, toliko bijelog vinskog osta. Sjediniti u sterilisanu teglu, dobro zatvoriti i ostaviti na mračnom mjestu 15 dana. Svakodnevno teglu promućkati. Poslije 15 dana balzamiko je spreman za upotrebu. Ako želite gušći balzamiko kratko ga prokuhajte sa malo meda.

DŽEM OD ŠIPKA

Potrebno je:

1 kg zrna od šipka
2,5 dcl vode
2,5 dcl soka od jabuka
Cukar

Priprema:

Sastaviti zrna šipka, vodu i sok i kuhati 15 minuta, pa procijediti kroz gusto sito. U dobijeni sok staviti po 30 dag cukra na svakih pola litra soka i kuhati 35 do 40 minuta. Džem nasuti u manje sterilisane tegle. Najbolje je čuvati u frižideru.

 

 

 

melasa šipakMELASA OD ŠIPAKA

Potrebno je:

4 ćikare svježeg soka od šipaka
½ ćikare cukra
½ ćikare soka od limuna

Priprema:

Sve sastojke staviti u lonac i jednu uru kuhati na srednje jakoj vatri. Često miješati da ne zagori. Melasa je spremna kada ispare 2/3 od početne količine sokova. Od ukupne količine dobije se jedna ćikara melase i ćuva u sterilisanoj tegli. U frižideru se čuva do 6 mjeseci. Odlična je kao prilog mesu i ribi.

 

 

liker šipak

OSTAC OD ŠIPKA

Zrna od 5 većih šipaka staviti u teglu i preliti sa litrom bijelog vinskog osta ili ostom od jabuka. Dobro zatvoriti i ostaviti na tamnom mjestu 15 do 20 dana. Procijediti kroz gusto sito ili gazu, pa pohraniti u botilje.

Napomena:
Za poboljšanje zdravlja piti po ožicu osta od šipka u čaši vode.

 

LIKER OD ŠIPAKA

Potrebno je:

1 kg zrna od šipaka
1 l dobre lozove rakije
½ kg cukra

Priprema:

Zrna šipaka, cukar I rakiju staviti u teglu, dobro zatvoriti I na mračnom mjestu ostaviti 15 do 20 dana. Svakodnevno treba protresti teglu. Procijediti kroz gusto sito i gazu, pa spremiti u botilje na mračnom mjestu. Piti nakon mjesec dana.

 

ŠIPAKKOLAČ SA ŠIPKOM

Potrebno je:
8 jaja, dram soli, 1,5 ćikarica cukra u prahu, gratana kora 1 limunan i 1 naranče, 3 ćikarice mljevenih mendula, 2 slatka šipka, jedan iscijeđen i jedan u zrna.
Priprema:
Razdvojite bjelanca od žumanaca. Bjelanca ubatiti sa malo soli dok ne očvrsnu, ali tako da ne budu pretvrda, pa dodati pola ćikarice cukra. Ostatak cukra i gratanu koricu limuna i naranče dodati žumancima i pjenasto ubatiti. Lagano umiješajte mendule, a zatim i bjelanca.
Ulijte u pleh obložen kartom za pečenje i pecite oko 40 minuta na 180 stepeni. Po potrebi lagano pokriti folijom da se ne prepeče. Preko pečenog i vrućeg kolača preliti sok od šipka i ostaviti da se u plehu ohladi. Servirati uz zrna šipka.
Po želji, kod serviranja dodati malo slatke pavlake.

 

salata sa šipkomSALATA OD KRUŠAKA I ŠIPAKA

Potrebno je :
30 dag miješane salate ( loćika, žućenica, rokula, mladi špinat )
4 ožice sjeckanih oraha
1 veća kruška
10 dag feta sira ili pljevaljskog
1 mala kapula
Ćikara zrna od šipka
Maslinovo ulje
So, papar

Priprema :

Salatu složiti na pijadelu, dodati na tanke fete narezanu krušku, pa posuti sjeckanim lukom, orasima i zrnima šipka. Dodati grubo izmrvljeni sir, popapriti, posoliti po potrebi i preliti maslinovim uljem.
Napomena:
Ovoj salati mogu se dodati kocke pečene piletine ili ćuretine.

 

SALATA OD SLANUTKA I ŠIPKA

Potrebno je:

Kvarat kuhanog slanutka
Ćikara zrna od šipka
Ćikara grupbo sjeckanih oraha
Maslinovo ulje
So, papar
4 – 5 ožica sjeckanih zelenih maslina
4 mlada luka sa perima
2 ožice soka od limuna
2 ožice sjeckanog petrusina

Priprema:

U terinu staviti slanutak, zrna šipka, orahe, masline i sjeckani mladi luk. Posoliti, popapriti, pa preliti uljem i sokom od limuna. Na kraju posuti sjeckanim petrusinom, lagano promiješati i ostaviti da stoji petnaestak minuta prije služenja.