Učenici OŠ „Drago Milović“ posjetili Azil za pse

U sklopu vannastavnih aktivnosti danas su učenici IV-ih razreda posjetili Azil za napuštene pse u Kavču.

Nakon humanitarne akcije „Podijeli užinu sa prijateljem“ OŠ „Drago Milović“, koja je u saradnji sa tivatskim Komunalnim preduzećem postavila dvije kante u kojima djeca odlažu ostatke užine namjenjene napuštenim životinjama, danas su đaci IV-ih razreda posjetili kotorsko-tivatski Azil. Učiteljice Tereza Bujišić i Selma Luković u vannastavnu aktivnost uključile su 41 učenika ukazavši im na problem napuštenih životinja. Učiteljica odjeljenja IV4, Selma Luković kazala je da je inicijativu za pomaganje Azilu započela direktorica škole, istakavši da su i oni donirali Azilu novce za dva džaka hrane. Ovom posjetom, kako  je rekla Lukovićeva upoznali su učenike sa problemom napuštenih životinja i na taj način đacima ukazali da to nije samo problem komunalaca, nego čitavog društva, pa i samih đaka.

Prilikom posjete Azilu, osim što su ih s oduševljenjem hranili, prema riječima Lukovićeve učenici su se igrali sa psima i zatražili da ih ponovo obiđu u skorijem periodu.