Veliki tivatski Gradski park dobio je danas još jednu novu sadnicu, još jedno “Stablo generacije”, posvećeno djacima prvacima našeg grada. To je akcija koju Dječiji savez Tivta tradicionalno organizuje na početku svake školske godine, tako da će generacija prvačića 2014/2015., od danas imati svoje stablo kao sjećanje na polazak u školu.
Sadnicu Čileanske jele je i ove godine obezbjedilo JP Komunalno a sa karakteristikama ovog drveta mališane je upoznala inženjer hortikulture, Tanja Krstović:
“Vaše stablo je porijeklom iz Australije i staro je 4 godine. Zasadićemo ga pored njegove “mame jelke”, koja ima 120 godina, a ovdje okolo je još šestoro njene “djece” koje su zasadile predhodne generacije tivatskih djaka- prvaka. Treba da budete ponosni što imate svoje drvo u ovom lijepom gradskom parku koje će obilježavati početak vašeg školovanja i morate ga paziti i obilaziti.”
Nakon eko priče i razgovora sa rukovodiocem službe Zelenilo, djeca su sa radnicima Komunalnog, zasadila svoje stablo i obećala da će ga paziti. Djacima prvacima iz O.Š. “Drago Milović”, na ovom lijepom dogadjaju u Gradskom parku, društvo su pravili i članovi starije uzrasne grupe iz JPU “Bambi”.
Sadnjom Stabla generacije, Dječiji savez Tivta je danas najavio početak obilježavanja Dječije nedjelje , manifestacije koja se nizom edukativno-zabavnih programa održava početkom oktobra, dugi niz godina u našem gradu.
