Kada priča o Boki, u glasu Maje Perfiljeve, osjeća se nostalgija, sjeta… Za kako ga je Momo Kapor nazvao „tihim, dalekim zalivom“… Koji nestaje i o kojem mašta, baš onako kako je maštala o njemu, dok je svoju „Bokeljsku noć“ pisala u Zagrebu, ispod kapaka se prisjećajući riječi svoje sestre Nadice.
– Ona mi je pričala o moru, o Rivi, o ljudima, pa i o nekim tipično našim svađicama… A ja sam pisala zamišljajući ovo naše plavetnilo i sjećajući se djetinjstva. Možda mi se samo čini, ali mislim da nigdje ne postoje svitanja kao nad Bokom. Tako je nastala i „Bokeška noć“ i evo u nedjelju ćemo proslaviti njen jubilej – 50 godina, a poseban kuriozitet je da će se pojaviti i umjetnica Radmila Karaklajić, sa kojom sam se prije neki dan čula i koja mi je rekla: i dalje nosim štikle – kaže Maja Perfiljeva, dama u svakom smislu te riječi.
Iz sjećanja je neizbrisivo i druženje sa Davorinom Popovićem, frontmenom grupe Indeksi, njegove tuče i psovanja. Ali i pjesma „Da sam ja netko“ koju je Maja napisala.
– Napisala sam je pod utiskom nepravde, posebno tadašnjeg rata u Vijetnamu i stravičnih slika jedne djevojčice koja bježi od bombi i koja završi na smetlištu. Strašno me boli nepravda, možda posebno onda kad nisam u mogućnosti da pomognem – kaže Maja.
Ona i dalje stvara, a inspiraciju traži u sebi i oko sebe. U ljubavi ili onome što treba ljubav da bude. U intrigama i idealima. I dobro je da je tako.
Veče 50 godina od pjesme „Bokeljska noć“ biće održano u nedjelju od 21 i 30 na Ljetnjoj pozornici u Tivtu u organizaciji Centra za kulturu. Na koncertu će se izvesti nove kompozicije komponovanih stihova Maje Perfiljeve, a izvest će ih dubrovački muzičari Tibor Karamehmedović i bend Gruhak te crnogorski izvođači Anita Popović, Dušanka Belada, Nikola Trtica, Marko Prentić, Stefan Čelanović i Andrijana Božović koja će s Gruhacima otpjevati poznati evergreen “Sanjam” grupe Indexi za koju je upravo Perfiljeva napisala tekst.
Specijalna gošća ove glazbeno-pjesničke večeri bit će Radmila Karaklajić koja je 1966. godine uz Vicu Vukova interpretirala pjesmu “Bokeljska noć” u raskošnom aranžmanu Pere Gotovca.
