Protekla je, napokon, jedna mirna noć, kazao je jutros našem Radiju Zoran Barbić komandir Službe zaštite i spašavanja Tivat.
“Bilo je nekih sitnih gašenja do 22h, ostatak noći je bio miran pa je dio ljudstva, tehnike i opreme povučen u bazu. Sada slijedi sredjivanje opreme i pripreme za nešto drugo, ne daj Bože da se desi. Opet bih uputio apel i molimo sve gradjane, turiste da vode računa jer jedino tako možemo sačuvati ovo naše blago. Moram istaći da su mještani i gosti Tivta vrlo disciplinovani. Svima dugujemo veliku zahvalnost. Imali smo toliko dobrovoljaca, firmi, pojedinaca koji su donosili hranu i piće, bukvalno su nas zatrpavali i dugujemo im jedno veliko hvala”- istakao je Barbić.
S obzirom koliko je opreme, tačnije vatrogasnih crijeva, uništeno, Barbić naglašava da im je trenutno to najpotrebnije. “Eto ko hoće da nam pomogne, jedino nam može pomoći u toj opremi koja se mnogo pohabala”.
Barbić je izrazio veliku zahvalnost i našem Radiju:
“Radio koji nas u svakoj situaciji prati, kome smo dužni jednu veliku zahvalnost za sve ove dane, i ne samo za ove dane, nego za sva dešavanja koja prenosi i prati”.
