Čarolija zvana Kaliopi uvukla se u srce Tivćana i gostiju na sinoćnjem koncertu sa scene jedrenjaka Jadran, a zvijezda iz Makedonije je sa osmijehom, moćnim glasom i velikom pozitivnom energijom otpjevala pjesme za razlicite generacije. I stare I nove zvučale su jednako dobro, ali ipak je, sudeći po reakcijama publike hit Rođeni – (“O , bato”) sa istoimenog albuma u Kaliopinoj tridesetogodišnjoj karijeri ostao najpopularniji. I druge, koje je napisao njen bivši suprug Romeo Gril, pjevačica je sa entizijazmom izvela.
Momenat kad je djelimično nestala struja pružio je i najljepši dio večeri, jer je diva, zajedno sa publikom i pratećim vokalima Julijom i Majom bez pomoći mikrofona otpjevala upravo svoj najveći hit, kojim je kasnije i završila koncert.
Koncert će posebno pamtiti i Ognjen, koji je, na Kaliopin poziv na sceni proslavio šesnaesti rođendan. Možemo izdvojiti i, za starije rokere poseban momenat, kad je Kaliopi, sa svojim odličnim bendom, izvela čuvenu pjesmu Dada Topića i grupe “Tajm”, Makedonija.
Zahvalivši TO Tivat na pozivu i na tome što su bili odlični domaćini , Kaliopi je obećala da će u naš grad ponovo doći. Pored toga što nikad nije nastupala na takvoj sceni, sinoćnji koncert svakako će pamtiti, jer kako je rekla, nikad joj se nije desilo da nestane struja i omogući joj tako posebnu čaroliju sa publikom. Nekom su suze, ali na Pinama su sinoć bili biseri.
