Najveći aplauz na večerašnoj utakmici Teodo-Partizan nisu dobili igrači već bivši bokser Zoran Vujičić iz Nikšića koji je u tivatskoj Župi u nezaboravnom boks meču nokautirao Madjara Erosa.
Vujičić se godinama bori sa teskom bolešću. Imao je veliku želju da ponovo dodje u Župi, radosno prihvativši poziv Teoda.
-Srce mi je puno. Za ovu dvoranu me vežu najljepše uspomene. Ovdje je pao veliki Eros – govori mi Zoran, prisjecajuci se da su službeni spikeri na meču bili Sabrija Vulic i ja.
Madjar je tada bio favorit, ali je Zoran, nošen fantastičnom podrškom tivatske publike, savladao Erosa.
Veliki borac sada se bori sa težim protivnikom. U kolicima, ali sa optimizmom i vječitim osmjehom. Poklanjam mu stihove:
Šampion si bio i ostao
to se uči, al uglavnom radja.
Ustaj'o si i kada si pao
ta pobjeda svakom je najslađa.
Dugo se grlimo. Šampion i njegov službeni spiker iz te daleke 1994. Publika je tada ovacijama pozdravila njegovu pobjedu. Večeras je ustala na noge i višeminutnim aplauzom pozdravila šampiona. Jednom šampion – uvijek šampion.
