Požar na 10-metarskoj jahti u akvatorijumu tivatskog zaliva, koji je MUP prijavio Službi zaštite i spašavanja u 8:55 sati, stavljen je pod kontrolu. Plovilo je prebačeno na siguran vez u marini Porto Montenegro, gdje se sada sprovode završne mjere kako bi se osiguralo da ne dođe do naknadnih posljedica po ljude, materijalna dobra i ekosistem. U požaru je lakše povrijeđena jedna osoba.
Nakon dojave MUP-a, na teren su se odmah uputili i dežurna i pripravna ekipa vatrogasne službe, a u akciju se uključila i protivpožarna ekipa marine Porto Montenegro. Ukupno 6 vatrogasnih vozila čekalo je na obali, dok je prvi dio akcije na moru izveo protivpožarni bord Jovana uz asistenciju plovila marine. Brod je, nakon što je ugašen plamen, priveden obali, gdje se uz detaljan pregled svih djelova broda, vodi računa da ne dođe do naknadne aktivacije plamena.
„Trenutno ispumpavamo vodu i protivpožarnu pjenu, kako bismo osigurali da ne dođe do štete za ekosistem. Naravno, prva faza akcije je bila evakuacija povrijeđenih. Jedna osoba je zadobila opekotine prvog stepena i za nju se pobrinula Hitna pomoć Tivat,“ objasnio je komandir Službe zaštite i spašavanja, Zoran Barbić.
