Potrebno je :
75 dag balancana
50 dag fileta oslića ili druge ribe
50 dag krtole
1 mala konzerva sjeckane pamidore
1 mrkva
1 čipula
2 špice česna
2 ožice prezle
Manja balica začinskog bilja ( bosiok, majčina dušica,petrusin )
Stabljika selena
Maslinovo ulje
So, papar
Priprema :
Balancane izrezati na fete, malo pouljiti i staviti na pleh obložen kartom za pečenje. Peći 15 minuta na 220 stepeni, okrenuti balancane i peći još desetak minuta. ( Balancana se može prigati na ulju ili grilovati) Krtolu oguliti i kuhati 15 minuta, pa je izrezati na fete.
Čipulu isjeckati i šufigati na vrelom ulju dok ne zastakli, pa dodati isjeckanu mrkvu, česan i stabljiku selena. Šufigati još par minuta, pa dodati pamidoru i pola isjeckanog začinskog bilja, a nakon tri – četiri minuta i ribu izrezanu na manje kockice. Posoliti i popapriti. Dinstati uz povremeno miješanje desetak minuta. Po potrebi doliti malo tople vode, pazeći da toć ostane gust.
Pleh nauljiti i poređati krtolu. Posoliti krtolu, posuti isjeckanim začinskim biljem i prekriti pripremljenim toćom, a preko rasporediti balancane. Ako je pleh manji musaku složiti u tri reda. Preko balancana posuti prezlu i peći na 180 stepeni oko 30 minuta.
