Učenici trećeg razreda OŠ „Drago Milović“ pripremili su kratku priredbu zajedno sa svojim učiteljicama povodom obilježavanja 20. novembra, Međunarodnog dana djeteta.
Priredba je održana danas u sali DTV Partizan, bez prisustva roditelja, a publika i učesnici bili su učenici sedam odjeljenja trećeg razreda OŠ ,,Drago Milović“.
Djeca su kroz igrokaze, recitacije i pjesme govorila o njihovim pravima na jedan poučan i šaljiv način. Hor trećeg razreda izveo je pjesmu ,,Djeca imaju pravo“ od pjesnika za djecu Dragana Radulovića, a Dječiji savez Tivta pomogao im je oko balona koje su nosile poruke mira.
,,Mi smo na nivou našeg aktiva došle na ideju da obilježimo 20. novembar Međunarodni dan djeteta, misleći da napravimo kao neki kraći igrokaz na času. Međutim, na inicijativu i podršku naše direktorice dobili smo salu DTV Partizan i proširili da to bude neka mini predstava, kako bi poslali svoj djeci svijeta poruku mira. Učestvovao je samo 3. razred OŠ ,,Drago Milović“ kao i područno odjeljenje iz Gradiošnice. Učiteljice trećih razreda izdvojile su po par učenika iz svog odjeljenja. Djeca su spremila sve za djecu, tako da su bili i publika i učesnici“, rekla je učiteljica Ana Braunović.
Salom je odjekivala snažna i emotivna poruka – Djeca imaju pravo da budu sretna djeca.
