Vremenske prilike će ipak dozvoliti da tradicionalni Krnevao lastovski krene danas iz Sedmog kvarta u dvije ure, kako je i planirano. Okupljanje “ispod smokve” i registracija maski je u toku, a u Donjoj Lastvi su i pripadnici saobraćajne policije OB Tivat, zaduženi da u 14 sati zaustave saobraćaj, kako bi povorka krenula prema lastovskoj rivi.
Predvođena Glazbeno-prosvjetnim društvom Tivat i Mjesnom muzikom Đenovići, te tivatskim mažoretkama, maškarana povorka će se kretati jadranskom magistralom do ulice Ruljina, kuda će se spustiti na rivu i odatle uputiti prema Domu kulture Jopis marković, gdje će biti održano suđenje karnevalu i zabava pod maskama, poručuju organizatori, NVO Harlekin.
