Humanitarni koncert “Christmas Magic” Muzičke škole Tivat održan je večeras, u bivšem Domu Vojske, a bio je posvećen našoj sugrađanki Tini Pean.
Muzika, raskošni glasovi, empatija, ljubav i poneka suza, obojile su večerašnji koncert.
Školski orkestar pod dirigentskom palicom prof. Martine Vuksanović, još jednom je pokazao veliku dozu profesionalnosti, a u tome su ih pratili članovi velikog hora koji vodi prof. Tamara Fistrić i hor prvog razreda pod rukovodstvom prof. Anđele Homen.
Specijalni gosti, koji su zaradili najveći aplauz, a ujedno izazvali najviše suza, bila su djeca Dnevnog centra, Miloš Koprivica, Saša Gvozdić, Luka Marić, Adrian Halai i Marija Kovačević. Njihova pratnja bile su one koje ih svakodnevno podržavaju, a to su asistentice Snježana Radonjić, Brankica Dosković, Andrea Iker i Svetlana Vuksanović.
Oni su zajedno sa orkestrom i solistima: Elenom Dacić, Sarom Ivanović, Doris Franović i Vjerom Radulović, otpjevali numeru “Hallelujah”. Mnogobrojna publika nije žalila dlanove, ali ni emocije.
Da iznenađenje bude veće, Djeda Mraz sa malom pomoćnicom, Vilenjačicom, izašao je na scenu, te korisnicima Dnevnog centra uručio poklone.
Pored njih, večerašnja gošća bila je Jelena Božović koja je sa svojom kćerkom Emilijom i malih horom, otpjevala pjesmu “Novogodišnje čestitke” za koju su muziku radili Marko Klepić i Mirsad Serhatlić, na tekst Dragana Radulovića, dok je aranžman za orkestar uradila prof. Martina Vuksanović.
Nakon njih nastupio je i Bojan Delić, koji je uz pomoć hora, otpjevao “Fritulu” od Petra Graša. Večerašnjem koncertu, rado se odazvao i tivatski bend Fankulo, u sastavu: Nataša Raičević sa sinom Adrianom Jokovićem, i Damir Nikolić.
Božićne i novogodišnje pjesme izvodili su i solisti: Valentina Nikolić, Antonia Vidović, Vjera Radulović, kao i Ilijana Jarić koja je otpjevala numeru sa Fankulo Bendom.
Pri kraju koncerta, Djeda Mraz je okupio mališane kako bi im podijelio slatkiše.
Iz Muzičke škole zahvalili su Porto Montenegru na gostoprimstvu.
