Odabrao: Mašo Miško Čekić
DANSKI SENDVIĆI
Potrebno je :
Ražani kruh
Konzerva haringe
Konzerva skuše
Dimljeni losos
Marinirani ili prigani škampi
Male polpete
Jetrena pašteta
Kuhana jaja i sl.
Priprema :
Sa haringom
Fete ražanog kruha namazati maslom ili mašću.
Dodati 3-4 komada marinirane haringe, a preko staviti fete kapule ili čipulice iz osta. Ukrasiti feticama rotkvice, kaparima i sjeckanim petrusinom.
Sa skušom
Fete kruha premazati po želji, a preko staviti komade konzervirane skuše. Preko skuše staviti malo majoneze i fetice krastavca. Ukrasiti sjeckanim perima mladog luka.
Sa dimljenim lososom
Na fete premazanog kruha dodati komadiće dimljenog lososa. Posoliti i popapriti po ukusu i po vrhu iscijediti sok od limuna.
Na vrh staviti ukiseljenu čipulicu ili škalonju, fetu limuna i isjeckanog kopra ili morača.
Sa škampima
Kruh namazati maslom ili majonezom, a preko staviti list hrskave salate i fetice avokada.
Na vrh staviti kozice ili škampe, malo posoliti i dodati koju kap limunovog soka. Po želji, dodati i malo majoneze i sjeckanog kopra ili morača.
Ostale sendviče praviti po želji i prema raspoloživim namirnicama. Poslužiti kao predjelo, užinu ili zakusku na druženjima.
RIBLJE POLPETE
Potrebno je :
½ kg fileta bakalara, oslića ili druge ribe
1 čipula
2 jaja
3 ožice brašna, najbolje od krtole
1/2 šoljice mlijeka
1 ožica isjeckanog petrusina
So, papar
Ulje za priganje
Salsa od kopra :
¼ šolje grčkog jogurta
¼ šolje majoneze
2 ožice isjeckanih kiselih krastavaca
1 ožica nasjeckanog svježeg kopra
1 m. ožica senfa
Priprema :
Sve sastojke za salsu od kopra sastavite i lagano izmješajte. Poklopiti i ostaviti u frižideru.
Filete ribe sitno nasjeckati ili kratko izblendati. Čipulu izgratati na gratatijer, dodati ribi i posoliti, pa dodati jaja, petrusin, papar i brašno. Sve dobro promiješati i dodati malo mlijeka ako je smjesa tvrda.
Pokriti i ostaviti na pola ure u frižideru.
Zagrijati ulje, pa ožicom vaditi smjesu od ribe, praviti polpete, okrugle ili spljoštene, i spuštati ih na vrelo ulje. Prigati ih oko 4 minuta, vaditi i poslužiti uz salsu od kopra.
PILETINA IZ LONCA
Potrebno je :
1 pile cca. 1,5 kg
1 balica petrusina
1 manja čipula
1,5 litra pilećeg temeljca može od kocke
Grančice majčine dušice
Ulje
Toć
Pileća juha
1,5 dl pavlake za kuhanje
8 dag masla
Pšenično brašno
So, papar
Priprema :
Pile očistiti, oprati i dobro posušiti, pa cijelo pile poprigati sa svih strana na vrelom ulju.
Luk narezati na četvrtine, pa pile napuniti lukom, majčinom dušicom i petrusinom. Po potrebi zatvoriti pile čačkalicama ili iglama za meso. Staviti pile u lonac s temeljcem i ostaviti da kuha jednu uru, pa provjeriti da li je kuhano. Po potrebi kuhati još koji minut. Pile izvaditi iz juhe, a juhu procijediti.
Toć
Rastopiti maslo pa umiješati 3 – 4 ožice brašna i pržiti miješajući, dok se brašno dobro zarumeni. Malo po malo dodavati juhu i miješati žicom kako se ne bi stvorile grudvice. Kuhati dok toć ne dobije željenu gustinu, pa dodati pavlaku za kuhanje, so i papar. ( Od količine upotrebljenog brašna zavisi količina potrebne juhe ). Pile narezati na komade i poslužiti uz toć, kuhanu krtolu i kisele krastavce.
SVINJETINA SA JABUKAMA
Potrebno je :
4 jabuke
2 čipule
8 feta freške šarene slanine
1 ožica cukra
So
Priprema :
Slaninu posoliti i prigati desetak minuta, dok ne dobije lijepu zlatnu boju.
Dok se svinjetina priga, oguliti i isjeckati čipulu, oguliti i na fete narezati jabuke.
Kad je svinjetina gotova izvaditi meso sa strane, a u masnoći koju je pustila svinjetina poprigati čipulu, pa dodati jabuke. Poklopiti i pustiti da se jabuke i čipula dinstaju. Povremeno promiješati, a nakon petnaestak minuta dodati malo cukra i soli. Kad jabuke dobiju željenu gustinu servirati uz priganu slaninu.
KOLAČ IZ SNOVA – DROMMEKAGE
Potrebno je :
3 jaja
15 dag cukra
1 saketić vanilije
23 dag brašna
1 saketić praška za pecivo
1,5 dcl punomasnog mlijeka
7,5 dag otopljenog masla
Preliv :
10 dag masla
15 dag kokosovog brašna
20 dag smeđeg cukra
7,5 dcl punomasnog mlijeka ili slatke pavlake
Dram soli
Pripema :
Mikserom ubatiti jaja, cukar i vaniliju, pa pažljivo umiješati brašno sa praškom za pecivo
Pomiješati mlijeko s otopljenim maslom i dodati u tijesto. Lagano promiješati i staviti tijesto u podmašćen i pobrašnjen kalup za tortu – 23 ili 24 cm.
Peć u prethodno zagrijanoj pećnici 35-40 minuta na 180 stepeni.
Za preliv, sve sastojke staviti u lonac i lagano otopiti.
Izvaditi tortu iz pećnice trenutak prije nego je gotova – i pažljivo rasporediti preliv po cijeloj torti. Vratiti u pećnicu. Pojačati vatru na 200C i peći još 5 minuta.
Ostaviti kolač da se ohladi i poslužiti.
