Odabrao : Mašo Miško Čekić
SLANA RIBA
Potrebno je :
3 – 5 slanih sardela po osobi
Maslinovo ulje
Kapula ili škalonja iz osta
Ostac
Po želji :
Masline, kapari
Sušena pamidora iz ulja
Priprema :
Očistiti slanu ribu i oprati u rastvoru vode i osta. Posušiti ribu kuhinjskom kartom i složiti na pijadelu ili pijate. Dodati na fete izrezanu kapulu ili škalonje iz osta. Obilato preliti maslinovim uljem, poprskati domaćim ostom ( po želji ) i dodati koju maslinu, kapare i sušenu pamidoru iz ulja. Ovako servirana slana riba služi se kao predjelo.
PILETINA SA MASLINAMA
Potrebno je :
4 pileća bataka ili karabataka
1,5 dcl bijelog vina
4 špice česna
15 – 20 maslina
8 cherry pamidora
Balica začinskog bilja ( ruzmarin, kadulja, manžurana i dr.)
Maslinovo ulje
So, papar
Priprema :
Na zagrijanom ulju kratko zažutiti česan, pa dodati batake i karabatake. Meso poprigati sa obje strane, a kad zažuti dodati vino, so, papar, začinsko bilje i pamidoru narezanu na polovine ili četvrtine. Kuhati 25 do 30 minuta i po potrebi dodavati po ožicu – dvije vrele vode. Poslužiti uz prilog po želji.
DŽEM OD PAMIDORE
Potrebno je :
1 kg zrelih pamidora ( najbolje volovsko srce )
55 dag cukra
3 saketića vanilije ili malu ožicu ekstrakta
1 ožica limunovog soka
Priprema :
Pamidoru preliti ključalom vodom, ostaviti nekoliko minuta i oguliti je. Narezati na komade, ukloniti špice, dodati cukar, vaniliju i sok od limuna. Poklopiti, ostaviti uru vremena kako bi se cukar počeo topiti, pa staviti na vatru. Čim provri, smanjiti vatru i kuhati 45 do 50 minuta uz često miješenje jer pamidora lako zagori.
Džem je spreman kad se zgusne i obloži ožicu. Treba računati da će se džem dodati učvrstiti dok se hladi. Po želji, džem se na kraju kuhanja može izmiksati štapnim mikserom radi laganije strukture.
Vrući džem ulliti u sterilisane teglice, zatvoriti i okrenuti naopako dok se ne ohladi. Spremiti na tamnom i hladnom mjestu.
