Odabrao : Mašo Miško ČekićNJOKE ZA SUPU
Potrebno je :
2 jaja
1 ožica masti ili masla
6 – 7 ožica griza
So
Priprema :
Jaja i masnoću dobro ubatiti, dodati so i griz,( uvijek pažljivo dodavati griz jer količina zavisi od veličine jaja, a smjesa ne smije biti tvrda ) pa miješati da se sastojci prožmu. Ostaviti da stoji jednu uru, pa malom ožicom vaditi njoke i spuštati u ključalu supu. Kuhati dvadesetak minuta.
RIŽOT OD PILEĆE DŽIGERICE
Potrebno je :
40 dag pileće džigerice
25 dag oriza
2 – 3 stabljike selena
1 čipula
4 špice česna
Maslinovo ulje, kocka masla
2 – 3 ožice gratanog tvrdog sira ( parmesan i sl.)
So, papar
Priprema :
Čipulu isjeckati na kockice i šufigati na ulju. Kad luk zastakli, dodati džigericu ( po potrebi presjeći svaku na pola ) i česan. Promiješati i šufigati par minuta, pa dodati oriz i na kockice usitnjene stabljike selena. Popapriti i nastaviti kuhanje uz podlijevanje vrućom pilećom juhom ili vodom. Pred kraj kuhanja dodati maslo, sir i so. MIješati dok se maslo ne otopi i odmah poslužiti.
ARMELINE (KAJSIJE, MARELICE) U SIRUPU
Potrebno je :
1 kg zrelih armelinki
8 dcl vode
40 dag cukra
1 limun
Pera nane, mente
Priprema:
U loncu pomiješati vodu, cukar, nekoliko pera mente i tanku koricu limuna, pa staviti na vatru. Kad provrije, smanjiti vatru i kuhati par minuta. Za to vrijeme oprati armeline i spustiti ih u lonac sa kipućom vodom. Blanširati 1 minut i ocijediti od vode.
Svaku armelinu prepoloviti, izvaditi špicu i slagati ih u sterilisane tegle. Pripremljeni sirup preliti preko armelinki i zatvoriti novim poklopcem. Tegle staviti u lonac, a između njih kuhinjske krpe kako ne bi popucale. Preliti tegle vodom, pustiti da provrije i kuhati 30 minuta na srednjoj vatri. Skloniti lonac sa vatre, a tegle ostaviti u loncu dok se potpuno ne ohlade. Hladne tegle spremiti na suhom mjestu, a najbolje je armelinke upotrijebiti nakon mjesec dana.
