Bokeška maslina održana na Pinama

Druga po redu manifestacija „Bokeška maslina“ održana je sinoć na rivi Pine uz 13 izlagača.
Pored maslina i proizvoda od maslinovog ulja, posjetioci su mogli da vide i probaju proizvode od smokava, nara, drenjina, malina, kao i domaće sireve, jaja, razno bilje, sapune, pa čak i proizvode od drveta.
Ono u čemu se svi izlagači slažu jeste da su Pine idealna lokacija za ovakve manifestacije zbog velikog broj gostiju koji tu boravi, šeta. Mnogi izlagači redovni su na tivatskim sajmovima i kažu da se uvijek rado vraćaju jer imaju svoje stalne mušterije. Proizvodjači se žale na loše vremenske uslove ovog proljeća, pa zbog velikih kiša kasni berba smokava, bilja, a i pčelama nije odgovaralo vrijeme, pa je u većini slučajeva dolazilo do rojevnog nagona.
I pored ovih problema, proizvodjači organskih proizvoda spremno su izašli na Sajam i Tivćanima i gostima ponudili bogatu lepezu produkata.

Organizator je Maslinarsko društvo Boka a pokrovitelj Turistička organizacija Tivat.