Diplome za 80 polaznika Obrazovnog centra „Ineska“

Obrazovni centar „Ineska“ licencirani zastupnik za programe Suan Pan mentalnu aritmetiku, brzo čitanje sa razumijevanjem „Mape uma“, kao i školice za predškolce, sinoć je u Kinu Boka u Kotoru priredio dodjelu diploma i medalja polaznicima za završene programe.
Program Suan Pan mentalna aritmetika je glavni razvojni program za djecu uzrasta od 5-14 godina, a kroz njega je prošlo više stotina djece iz Tivta, Kotora, Budve ali i drugih gradova, jer su roditelji prepoznali dobrobiti ovog programa.
Direktorica Obrazovnog centra „Ineska“ Bobana Golović Kažić zahvalila je djeci na velikom trudu i radu, ali i roditeljima na podršci koju pružaju djeci.
„U ovom uzrastu djeci je zaista potrebna podrška, a potrebna im je uvijek. Čak i nama odraslima podrška roditelja je uvijek dobrodošla. Želim da se zahvalim svim školama i institucijama koje podržavaju naš rad i smatraju da je dobro i korisno ono što radimo, eto zato i trajemo. Podržavajte vašu djecu, a vi djeco slušajte svoje roditelje jer ipak su oni malo ispred vas. Molim vas za motivaciju, da ne posustanete, nekad bude teško ali kroz te teške situacije se i razvijamo, učimo, postajemo snažniji i bolji“.
Na dodjeli diploma bilo je ukupno 80 nagradjene djece, a po riječima direktorice Bobane Golović Kažić, Tivćana je uvijek najviše, pa je tako i sinoć bilo više od 40 tivatskih polaznika.