Šije maske u invalidskim kolicima

Sekretarka Udruženja paraplegičara opštine Kotor, Ljuba Šljuka primjer je humanosti i empatije u danima kada su nam ovakvi ljudi i njihov volonterski rad prijeko potrebni.

Ljuba je za naš radio kazala da je na ideju došla iz prostog razloga jer maski više nema ni u jednoj apoteci, kako je kazala zbog uspaničenih  građana koji su pokupovali i više nego što im treba, ne misleći na ostale.

“Počela sam izrađivati maske prije tri dana i do sada sam ih podjelila preko 30, evo i danas šijem i blizu sam brojke od 100 komada pa bih poručila i vašim sugrađanima da mi se jave ukoliko im trebaju maske. Materijal su mi ponudile sugrađanke Dragana Knežević i Dijana Dika Saveljić, a u šivenju maski mi se pridružila Senka Jovanović, koja to radi u svom stanu.  Nisam željela ovoliku medijsku eksponiranost, željela sam samo pomoći ljudima u ovoj situaciji, koja nas je zadesila i u kojoj moramo biti odgovorni i solidarni, zato poručujem svima – ostanite doma”, zaključila je Šljuka.

Za sve one koji masku nemaju, a potrebna im je Ljubu Šljuku možete pozvati na broj 069 451 685.

Photo: Skala Radio