Vuksanović: Prst u oko Crnoj Gori

Poslanik Hrvatske građanske inicijative u Skupštini Crne Gore Adrijan Vuksanović ponovno je posjetio Igora Tomkića u Beranama, nakon što mu je zapaljena trgovinska radnja – saopšteno je iz ove partije.

On je izrazio zgražavanje na najnovim činom podmukle agresije na mirnu obitelj Tomkić i najenergičnije zatražio od svih institucija zakonsku reakciju, ali i odgovornost ako do nje ne dođe.

„Ovo su događaji koji aludiraju na devedesete godine i sve što smo tada proživljavali. Ne želim vjerovati da kao društvo nismo nadišli ovakve pojave, ali također želim da me država i sve što ona predstavlja, uvjeri u to. Očigledno da imao pojedinih koji vjeruju da su iznad države Crne Gore i zabijaju joj prst u oko. Očekujem da odbranimo sve one vrijednosti koje zastupamo i kojima se ponosimo, a za tako nešto potreban je snažan odgovor državnih organa“, izjavio je Vuksanović.

On je imao i komunikaciju s premijerom Markovićem, ministrom unutrašnjih poslova Nuhodžićem, kao i šefom Centrom bezbjednosti Bulatovićem. Od njih je dobio čvrsta uvjeravanja da će Tomkićima biti pružena svaka zaštita i sigurnost.

Inače zbog ovih nemilih dešavanja, za petak u 11.30 zakazana je vanredna konferencija za medije Hrvatske građanske inicijative, koja će biti u Parlamentu Crne Gore.